Karen Baptist Convention

ၦၤကညီဘျၢထံခဝ့ၡၢၣ် တၢ်ဘၣ်ထွဲတုၤအိၣ်လိာ်သးဝဲၤကျိၤ သုးကျဲၤမၤဘၣ်ဝဲ တၢ်ကတိၤလီၤဆီဘၣ်ထွဲဒီး AI  ဖဲလါမ့ၤ(၁၄)သီႇ ၂ဝ၂၆အနံၤ ဟါ(၆-၈)နၣ်ရံၣ် လၢမဲာ်သကိးမဲာ်န့ၣ်လီၤ. တၢ်ရဲၣ်တၢ်ကျဲၤအံၤဘၣ်တၢ်မၤအီၤဖဲ နံၣ်(၁ဝဝ) တၢ်စံးဘျုးတၢ်သူၣ်ထီၣ်ႇ ၁၂၁(ဃ), အလူၣ် တၢ်အိၣ်ဖှိၣ်ဒၢးန့ၣ်လီၤ.သရၣ်လၢဟ့ၣ်ခီဟ့ၣ်နီၤတၢ်မ့ၢ်ဝဲ-သရၣ်မ့လဲးႇ  ဒီး ၦၤဟဲထီၣ်တၢ်ရဲၣ်တၢ်ကျဲၤတဖၣ်မ့ၢ်ဝဲ- ၦၤကညီဘျၢထံခဝ့ၡၢၣ် ကမံးတံာ်မၤတၢ်ခိၣ်နၢ်တဖၣ်န့ၣ်လီၤ.စးထီၣ်တၢ်ရဲၣ်တၢ်ကျဲၤအံၤလၢ သရၣ်ဒိၣ်ယွၤဒုးမူ(ခဝ့ၡၢၣ်နဲၣ်ရွဲၣ်) အတၢ်ထုကဖၣ်ႇ တၢ်ဟ့ၣ်လီၤတၢ်အဲၣ်တၢ်ဟ့ၣ်  ဒီးတၢ်ထုကဖၣ်လၢ သရၣ်မုၣ်ဒိၣ်ဒီးကထၢၣ်လ့ထူ (နဲၣ်ရွဲၣ်သဃဲၤ), ဒီးတၢ်ဆိၣ်ဂ့ၤပျၢ်လၢ-သရၣ်ဒိၣ်မူလၢၢ်ဂ့ၤ(နဲၣ်ရွဲၣ်ႇ ကီၢ်ပသံၣ်မၠီမၠး)န့ၣ်လီၤ. ၦၤဟဲထီၣ်တၢ်ရဲၣ်တၢ်ကျဲၤအံၤခဲလၢာ်အိၣ်ဝဲ(၂၄)ဂၤန့ၣ်လီၤ.

ၦၤကညီဘျၢထံခဝ့ၡၢၣ် တၢ်ဘၣ်ထွဲတုၤအိၣ်လိာ်သးဝဲၤကျိၤအိၣ်ဒီး Sharing Audio Mastering Knowledge (၁)သီတၢ်မၤလိ ဘၣ်တၢ်မၤအီၤဖဲ လါမ့ၤ(၈)သီႇ ၂ဝ၂၆ အနံၤလၢ ဆဲးကျိးန့ၢ်တီၤန့ၣ်လီၤ. တၢ်မၤလိအံၤ စးထီၣ်အီၤလၢ တၢ်ဘူၣ်သကိးဘါသကိးယွၤ  ၦၤပၢၤလီၢ်ဆ့ၣ်နီၤမ့ၢ်ဝဲ-သရၣ်ကၠဲးစၢၣ်ကၠါ(ၦၤနဲၣ်တၢ်သဃဲၤ), တၢ်ဒုးသ့ၣ်ညါလၢ- သရၣ်မုၣ်ဒီးကထၢၣ်ဂ့ၤဂ့ၤထူ(ၦၤနဲၣ်တၢ်), တၢ်ဟ့ၣ်ဂံၢ်ဟ့ၣ်ဘါ-သရၣ်မုၣ်ၡံထၣ်ဖီ(ၦၤပၢၤစ့), တၢ်ထုကဖၣ် ဒီးဆိၣ်ဂ့ၤပျၢ်တၢ်လၢ သရၣ်ဒိၣ်မူဖျၢၣ်ထူ (ဝဲၤကျိၤ ၦၤပၢၤလီၢ်ဆ့ၣ်နီၤ)န့ၣ်လီၤ.တၢ်မၤလိအံၤစးထီၣ်ဖဲ ဂီၤ(၉)နၣ်ရံၣ်တုၤ ဟါ(၃)နၣ်ရံၣ်န့ၣ်လီၤ. သရၣ်သိၣ်လိတၢ်မ့ၢ်ဝဲ- သရၣ်ဒိၣ်ဒီးကထၢၣ်လၢၢ်ဝါန့ၣ်လီၤ. တၢ်မၤလိအံၤ လၢကီၢ်ခၢၣ်စးၦၤဟဲထီၣ်အိၣ်ဝဲ (၁၂)ဂၤ ဒီး ၦၤဟဲမၤလိတၢ်တဖၣ် တနီၤမ့ၢ်ဝဲၦၤမၤလိတ့ၢ်တၢ်ကၠိဖိလီၢ်လံၤ ဒီး တနီၤမ့ၢ် ၦၤအသီတဖၣ်န့ၣ်လီၤ.

ၦၤကညီဘျၢထံခဝ့ၡၢၣ် တၢ်ဘၣ်ထဲတွုၤအိၣ်လိာ်သးဝဲၤကျိၤသုးကျဲၤတီခိၣ်ရိၣ်မဲ ''AI Basic In a Day" တၢ်မၤလိ လၢဝဲၤလီၢ်ၦၤမၤသကိးတၢ်တဖၣ်အဂီၢ် ဒီး တၢ်မၤလိအံၤဘၣ်တၢ်မၤအီၤဖဲ လါဖ့းဘြူၤအါရံၤ(၂ဝ)သီႇ ၂ဝ၂၆အနံၤ န့ၣ်လီၤ.တၢ်မၤလိအလီၢ်မ့ၢ်ဝဲ ၃၉၆, ဘိၣ်ခၠူးကျဲႇ လါမတီၣ်ႇ တၢ်အိၣ်ဖှိၣ်ဒၢးန့ၣ်လီၤ.အိၣ်ဒီး တၢ်အိးထီၣ်တၢ်မၤလိလၢ တၢ်ဘူၣ်သကိးဘါသကိးန့ၣ်လီၤ.တၢ်ဘါကတီၢ် ၦၤပၢၤလီၢ်ဆ့ၣ်နီၤ-သရၣ်မုၣ်ဒီးကထၢၣ်ဂ့ၤဂ့ၤထူႇ တၢ်ဟ့ၣ်ဂံၢ်ဟ့ၣ်ဘါ ဒီးတၢ်ထုကဖၣ်လၢ သရၣ်မုၣ်ခၠိၣ်ခၠိၣ်ဖၠူၣ်(ဝဲၤဒၢးခိၣ်)န့ၣ်လီၤ. သရၣ်သိၣ်လိတၢ်မ့ၢ်ဝဲ-သရၣ်မ့လဲးန့ၣ်လီၤ. အိၣ်ဒီးတၢ်မၤလၤကပီၤ သရၣ် ကတီၢ် ၦၤပၢၤလီၢ်ဆ့ၣ်နီၤ-သရၣ်ကၠဲးစၢၣ်ကၠါႇ တၢ်ကတိၤဒိၣ်သရၣ်-သရၣ်အဲၣ်ဘျုးႇ တၢ်ထုကဖၣ်-သရၣ်တီလိၤမူန့ၣ်လီၤ. ဝဲၤကျိၤ(၁ဝ)ကျိၤလၢအမ့ၢ်- ပိာ်ခွါဝဲၤကျိၤႇ ပိာ်မုၣ်ဝဲၤကျိၤႇ ထုးထီၣ်ရၤလီၤလံာ်လဲၢ်ဝဲၤကျိၤႇ တၢ်သးခုကစီၣ်ဒီးမံးၡၢၣ်ဝဲၤကျိၤႇ တၢ်ကတဲာ်ကတီၤဒုးဒိၣ်ထီၣ်ထီထီၣ်ခိၣ်နၢ်ဝဲၤကျိၤႇ ယွၤဂ့ၢ်ပီညါဝဲၤကျိၤႇ လံာ်လဲၢ်ဒီးတၢ်ဆဲးတၢ်လၤဝဲၤကျိၤႇ တၢ်ကဟုကယာ်ဒီး တၢ်ကူၣ်လိာ်တၢ်ဝဲၤကျိၤႇ ဝဲၤကျိၤလၢသးစၢ်တၢ်မၤဂီၢ်ႇ ခရံာ်ဖိတၢ်မၤဂ့ၤမၤစၢၤဒီး တၢ်ဂုၤထီၣ်ပသီထီၣ်ခိၣ်နၢ်ဝဲၤကျိၤ ဒီးခၢၣ်စး ၦၤဟဲထီၣ်အိၣ်ဝဲ(၂ဝ)ဂၤန့ၣ်လီၤ.

ၦၤကညီဘျၢထံခဝ့ၡၢၣ် တၢ်ဘၣ်ထွဲတုၤအိၣ်လိာ်သးဝဲၤကျိၤ  အိၣ်ဒီး တၢ်သုးကျဲၤထုးထီၣ်လံာ်တၢ်န့ၢ်သါအဃံအလၤ နီၣ်ဂံၢ်(၁၆) လၢအအိၣ်ဒီး ထါသးဝံၣ်ကစၢ်ယွၤအယုၢ်(၆ဝ)အၦၤကွဲးထါတဖၣ် အသးသမူအဂ့ၢ်ဖုၣ်ကိာ်ႇ တၢ်သံကျံလၢ ထါသးဝံၣ်ကစၢ်ယွၤအပူၤအတၢ်ပာ်ဖျါအဂ့ၢ်ႇ လံာ်စီဆှံဘၣ်ထဲတွၢ်သူၣ်ဝံၣ်သးဆၢတဖၣ်န့ၣ်လီၤ. ၦၤကွဲးလံာ်မ့ၢ်ဝဲ သရၣ်မုၣ်ဒီးကထၢၣ်ဖဲပလဲန့ၣ်လီၤ. မ့ၢ်လံာ်ဒိၣ်ၦ့ၤဒိၣ်တဘ့ၣ်အဃိ ပၦ့ၤဖး ဟ့ၣ်ဂံၢ်ဟ့ၣ်ဘါသကိးသ့ဝဲန့ၣ်လီၤ. လံာ်အံၤဒိးန့ၢ်သ့လၢ တၢ်ဘၣ်ထွဲတုၤအိၣ်လိာ်သးဝဲၤကျိၤ ဒီး ခဝ့ၡၢၣ်တၢ်ဆါလံာ်ကျး စးထီၣ်လါ ဒံၢ်စ့ဘၢၣ်(၁၈)သီႇ ၂ဝ၂၅နံၣ်အပူၤန့ၣ်လီၤ.န့ၣ်လီၤ.

ၦၤကညီဘျၢထံခဝ့ၡၢၣ် တၢ်ဘၣ်ထွဲတုၤအိၣ်လိာ်သးဝဲၤကျိၤ လၢတၢ်မၤသကိးတၢ်ဒီး ကရူၢ်(၃) ''တၢ်ဒုးဆူၣ်ထီၣ် တၢ်အိၣ်ဖှိၣ်တၢ်ရဲၣ်တၢ်ကျဲၤ'' ဒီးတီခိၣ်ရိၣ်မဲသုးကျဲၤမၤ ဘၣ်  ''ဘျၢထံခရံာ်ဖိတၢ်စူၢ်တၢ်နာ်အဂံၢ်ထံး" တၢ်သးဝံၣ်ပြၢ လၢကီၢ်အဘ့ၣ်(၂ဝ)ဝဲၤလီၢ်တဖၣ်န့ၣ်လီၤ. ကီၢ်နုာ်လီၤသတြီၤတၢ်အိၣ်ဝဲ(၁၆)ဘ့ၣ်န့ၣ်လီၤ. စံၣ်ညီၣ်ကီၢ်တဖၣ်လၢအမ့ၢ်-သရၣ်ဒိၣ်တီသးဖှံႇ သရၣ်ရ့ဘိႇ သရၣ်ဒီးကထၢၣ်န့ၢ်လ့အီၣ်တဖၣ် ထံၣ်လိာ်သး ဖဲလါစဲးပတ့ဘၢၣ်(၉)သီႇ မုၢ်ဆါ(၁)နၣ်ရံၣ်လၢ ဝဲၤကျိၤအဒၢးန့ၣ်လီၤ. တၢ်ဒုးသ့ၣ်ညါ ၦၤန့ၢ်ခိၣ်ဖး ဒီးတၢ်ဟ့ၣ်လီၤခိၣ်ဖးကမ့ၢ်ဝဲဖဲ လါနိၣ်ဝ့ဘၢၣ်(၁၉)သီႇ၂ဝ၂၅ ဟါပၢဆှၢတၢ်ကမံးတံာ် တၢ်အိၣ်ဖှိၣ်ဝံၤအဆၢကတီၢ်န့ၣ်လီၤ.

ၦၤကညီဘျၢထံခဝ့ၡၢၣ် တၢ်ဘၣ်ထဲတုၤအိၣ်လိာ်သးဝဲၤကျိၤဒီး ထုးထီၣ်ရၤလီၤလံာ်လဲၢ်ဝဲၤကျိၤ ပာ်ဖှိၣ်မၤသကိး တၢ်သ့ပၢဆှၢတၢ်ကစီၣ် ဒီး စံၣ်စိၤနုာ်တၢ်ဆဲးကျိးတၢ်မၤလိ(၉)ဘျီတဘျီ ဖဲလါယူၤလံ(၇)သီတုၤ(၁၂)သီႇ ဖဲခဝ့ၡၢၣ်နံၣ်(၁ဝဝ)တၢ်စံးဘျုးတၢ်သူၣ်ထီၣ်ႇ ၁၂၁(ဃ), အလူၣ်န့ၣ်လီၤ. ဖဲလါယူၤလံ(၇)သီဟါ (၃)နၣ်ရံၣ်အဆၢကတီၢ် အိၣ်ဒီးတၢ်အိးထီၣ်တၢ်မၤလိလၢ တၢ်ဘူၣ်တၢ်ဘါတၢ်ရဲၣ်တၢ်ကျဲၤန့ၣ်လီၤ. တၢ်ဘူၣ်တၢ်ဘါကတီၤ တၢ်ကတိၤဆၢဂ့ၤဒီးတၢ်ကစီၣ် ဘၣ်တၢ်ဟ့ၣ်အီၤလၢ သရၣ်ဒိၣ်ယွၤဒုးမူ(ၦၤကညီဘျၢထံခဝ့ၡၢၣ် နဲၣ်ရွဲၣ်), တၢ်ထုကဖၣ်အလၢအၦဲၤလၢ -သရၣ်မုၣ်ဒိၣ်မၠီမၠးဖီ(နဲၣ်ရွဲၣ်သဃဲၤ- တၢ်ရ့လိာ်မၤသကိးဒီး တၢ်ဂုၤထီၣ်ပသီထီၣ်)န့ၣ်လီၤ.ပိာ်ထွဲထီဿအခံလၢ တၢ်ဒုးသ့ၣ်ညါလီၤအသးန့ၣ်လီၤ. ဖဲလါယူၤလံ(၈)သီ ဂီၤ(၉)နၣ်ရံၣ်တုၤမုၢ်ဆါ(၁၂)နၣ်ရံၣ် အိၣ်ဒီး တၢ်သိၣ်လိလၢအမ့ၢ် Biblical Foundation For Media လၢ သရၣ်ဒိၣ်ဒီးကထၢၣ်လၢၢ်ဝါႇ မုၢ်ဆါ(၁)နၣ်ရံၣ်တုၤ(၄)နၣ်ရံၣ် ဝံၤဟံးန့ၢ်ဟါတၢ်အီၣ် ဒီး ဟါ(၆-၇း၃ဝ) စးထီၣ်ကဒီး တၢ်သိၣ်လၢအမ့ၢ် Public Relations လၢသရၣ်ဒိၣ်မူဖျၢၣ်ထူန့ၣ်လီၤ. လါယူၤလံ(၉)သီႇ အိၣ်ဒီးတၢ်သိၣ်လိလၢ အမ့ၢ် Journalism and Media Ethics လၢ သရၣ်မုၣ်ဒိၣ်တ့ၣ်မ့ၣ်ဖူၣ်န့ၣ်လီၤ. လါယူၤလံ(၁ဝ)သီႇ အိၣ်ဒီး Digital Security ဘၣ်တၢ်ဟ့ၣ်ခီဟ့ၣ်နီၤလၢ သရၣ်မ့လဲး ဟါ(၅-၆း၃ဝ)အိၣ်ဒီး တၢ်ကတိၤလီၤဆီလၢ နါမူလ့န့ၣ်လီၤ. လါယူၤလံ(၁၁)သီႇ အိၣ်ဒီး Mobile photo taking and Video Edit သရၣ်လ့ထူန့ၣ်လီၤ. ဟါ(၅-၆း၃ဝ)နၣ်ရံၣ် အိၣ်ဒီးတၢ်ကတိၤလီၤဆီလၢ သရၣ်သီၣ်စၢၣ်န့ၣ်လီၤ. လါယူၤလံ(၁၂)သီႇ ဂီၤ(၈းဝဝ-၈း၃ဝ)နၣ်ရံၣ်အိၣ်ဒီး တၢ်ခံကွၢ်စီၤကွၢ်က့ၤတၢ်မၤလိ ဒီးတၢ်ဟ့ၣ်လီၤခိၣ်ဖးလၢ တၢ်မၤလ့ၤတၢ်ဒိပြၢတၢ်ဂီၤန့ၣ်လီၤ. ဂီၤ(၈း၃ဝ-၉း၃ဝ)တၢ်ပျၢ်က့ၤတၢ်မၤလိလၢ တၢ်ဘူၣ်တၢ်ဘါတၢ်ရဲၣ်တၢ်ကျဲၤန့ၣ်လီၤ. တၢ်ရဲၣ်တၢ်ကျဲၤတဘျီအံၤတၢ်ထုကဖၣ်အလၢအၦဲၤလၢ သရၣ်မုၣ်ဒိၣ်ဒီးကထၢၣ်လ့ထူ(နဲၣ်ရွဲၣ်သဃဲၤ- တၢ်ပၢတၢ်ဆှၢ)ႇ ဒီးတၢ်ကစီၣ်လၢ-သရၣ်မုၣ်ၡံထၣ်ဖီ(ၦၤပၢၤစ့)န့ၣ်လီၤ. အိၣ်စ့ၢ်ကီးဒီး တၢ်ဟ့ၣ်လီၤ လံာ်အုၣ်သးလၢ ၦၤမၤလိတၢ်ဖိတဖၣ်န့ၣ်လီၤ. တၢ်မၤလိတဘျီအံၤ ကီၢ်(၁၁)ခၢၣ်စးၦၤဟဲထီၣ်အိၣ်ဝဲ (၁၄)ဂၤန့ၣ်လီၤ.

ၦၤကညီဘျၢထံခဝ့ၡၢၣ် တၢ်ဘၣ်ထွဲတုၤအိၣ်လိာ်သးဝဲၤကျိၤအိၣ်ဒီး ''တၢ်သ့ပၢဆှၢ တၢ်အိၣ်ဖှိၣ်တၢ်သူၣ်ဝံၣ်သးဆၢတၢ်မၤလိ'' ဖဲလါဖ့းဘြူၤအါရံၤ(၁၉-၂၁)သီႇ ၂ဝ၂၅အနံၤဖဲ ၦၤကညီဘျၢထံခဝ့ၡၢၣ်ဝဲၤလီၢ် တၢ်အိၣ်ဖှိၣ်အဒၢးန့ၣ်လီၤ. အိၣ်ဒီး တၢ်အိးထီၣ်တၢ်သိၣ်လိခီဖျိ တၢ်ဘူၣ်သကိးဘါသကိးယွၤလီၤ. တၢ်ဘါကတီၢ် တၢ်ကစီၣ်ဘၣ်တၢ်ဟ့ၣ်ခီဟ့ၣ်နီၤလၢ သရၣ်မုၣ်ၡံထၣ်ဖီ(ၦၤပၢၤစ့ႇ ၦၤကညီဘျၢထံခဝ့ၡၢၣ်)န့ၣ်လီၤ. တၢ်မၤလိတၢတသီ ဘၣ်တၢ်ဟ့ၣ်ခီဟ့ၣ်နီၤတၢ်လၢ သရၣ်မုၣ်စဲလံၣ်အီၣ်ႇ ခံသီတသီလၢ သရၣ်ဒိၣ်တီသးဖှံ ဒီးသၢသီတသီလၢ သရၣ်မုၣ်ဒီးကထၢၣ်ဖဲပလဲတဖၣ်န့ၣ်လီၤ. ကီၢ်လၢဟဲထီၣ်တၢ်မၤလိတဖၣ်မ့ၢ်ဝဲ- ကီၢ်တကူၣ်ႇ ကီၢ်ပကိတကူၣ်ႇ ကီၢ်မၠီမၠးႇ ကီၢ်ပသံၣ်မၠီမၠးႇ ကီၢ်တီအူပကူႇ ကီၢ်တီအူသၣ်တီၣ်ဘှဲမိၤၦၤႇ တီအူကီၢ်ကဲၤခၢၣ်ကဲၤဘါႇ ကီၢ်ဒဝဲၣ်-ဘျံးႇ ကီၢ်ပၠံၣ်-သၣ်ယၣ်ဝတံၣ်ႇ ကီၢ်ကယါဖူးႇ ကီၢ်ချၢၣ်လွံၢ်ထူၣ်ခၢၣ်စးန့ၣ်လီၤ. ခၢၣ်စးဟဲထီၣ်အိၣ်ဝဲ(၁၇)ဂၤန့ၣ်လီၤ.

ဖဲလါယူၤ ၂၆-၂၈သီႇ ၂ဝ၂၄ နံၣ်န့ၣ်ပအိၣ်ဒီး Page Maker, Word, Power Point အတၢ်မၤလိန့ၣ်လီၤ. တၢ်မၤလိအံၤဘၣ်တၢ်သုးကျဲၤမၤအီၤလၢ ၦၤကညီဘျၢထံခဝ့ၡၢၣ်ဝဲၤလီၢ်ၦၤမၤတၢ်ဖိတဖၣ်အဂီၢ်ဒီး ဘၣ်တၢ်တီခိၣ်ရိၣ်မဲအီၤလၢ တၢ်ဘၣ်ထွဲတုၤအိၣ်လိ၁်သးဝဲၤကျိၤန့ၣ်လီၤ. တၢ်မၤလိအံၤဘၣ်တၢ်ဟ့ၣ်ခီဟ့ၣ်နီၤအီၤလၢ သရၣ်စဲးဒီးန့ၣ်လီၤ. ၦၤဟဲထီၣ်တၢ်မၤလိလၢ ဝဲၤကျိၤခၢၣ်စး ခဲလၢ၁်အိၣ်ဝဲ (၁၆) ဂၤန့ၣ်လီၤ.

ၦၤကညီဘျၢထံခဝ့ၡၢၣ် တၢ်ဘၣ်ထဲတွုၤအိၣ်လိာ်သးဝဲၤကျိၤ အိၣ်ဒီး Basic Training of Audio Recording  တၢ်မၤလိ ဖဲ လါမ့ၤ၂ ဝတုၤ ၂၅ သီႇ ၂ဝ၂၄နံၣ်န့ၣ်လီၤ. တၢ်မၤလိအံၤ ဘၣ်တၢ်မၤအီၤဖဲ "Studio Door" ဒီး သရၣ်သိၣ်လိ တၢ်မ့ၢ်ဝဲ- သရၣ်ဒိၣ်ဒီးကထၢၣ်လၢၢ်ဝါန့ၣ်လီၤ. အိၣ်ဒီးတၢ်အိးထီၣ်တၢ်မၤလိတဘျီအံၤဖဲ လါမ့ၤ ၂ ဝသီ ဟါ န့ၣ်လီၤ.တၢ်မၤလိအံၤဘၣ်တၢ်သိၣ်လိအီၤလၢ တၢ်မၤလ့ၤအါအါန့ၣ်လီၤ. ကီၢ်ခၢၣ်စး ၦၤဟဲထီၣ်တၢ်မၤလိအိၣ်ဝဲ(၈)ဂၤလၢ ကီၢ်ပကိတကူၣ်ႇ ကီၢ်ချၢၣ်လွံၢ်ထူၣ်ႇ ကီၢ်ပၠံၣ်သၣ်ယၣ်ဝတံၣ်ႇ ကီၢ်တီအူသၣ်တီၣ်ဘှဲမိၤၦၤႇ တီအူကီၢ်ကဲၤခၢၣ်ကဲၤဘါ ဒီး ကီၢ်တီအူပကူတဖၣ်န့ၣ်လီၤ.

ၦၤကညီဘျၢထံခဝ့ၡၢၣ်ႇ တၢ်ဘၣ်ထွဲတုၤအိၣ်လိ၁်သးဝဲၤကျိၤအိၣ်ဒီးတၢ်အိးထီၣ် တၢ်မၤလိသ့တၢ်တ့ နိးအပတီၢ်(၁)အတၢ်မၤလိအံၤ ဘၣ်တၢ်စးထီၣ်အီၤဖဲ ၂.၂.၂ဝ၂၄ အနံၤန့ၣ်လီၤ. တၢ်အိးထီၣ်တၢ်ရဲၣ်တၢ်ကျဲၤကတီၢ်ၦၤပၢၤလီၢ်ဆ့ၣ်နီၤမ့ၢ်-သရၣ်မုၣ်ဂ့ၤဂ့ၤထူ(တၢ်ဘၣ်ထွဲတုၤအိၣ်လိ၁်သးဝဲၤကျိၤႇၦၤနဲၣ်တၢ်)ႇ တၢ်ဟ့ၣ်ဂံၢ်ဟ့ၣ်ဘါ-သရၣ်မုၣ်ဒီးကထၢၣ်လ့ထူ(နဲၣ်ရွဲၣ်သဃဲၤႇတၢ်ပၢတၢ်ဆှၢ)ႇ တၢ်ထုကဖၣ်လၢခံ-သရၣ်ဖျါဆဲး(ကီၢ်ပၠံၣ်သၣ်ယၣ်ဝတံၣ်)န့ၣ်လီၤ. တၢ်မၤလိအံၤမ့ၢ်ဒၣ်လၢခဝ့ၡၢၣ်ဖိလံၤႇ ကီၢ်အဘ့ၣ်(၂ဝ)အဂီၢ်န့ၣ်လီၤ. ၦၤထီၣ်တၢ်မၤလိတဖၣ်လၢကီၢ်ခၢၣ်စးဒီးခဝ့ၡၢၣ်ဝဲၤလီၢ်တဖၣ်ခဲလၢ၁်အိၣ်ဝဲ (၂၂)ဂၤန့ၣ်လီၤ. ပှၤလၢအဟ့ၣ်ခီဟ့ၣ်နီၤတၢ်သိၣ်လိမ့ၢ်-သရၣ်ထံၣ်န့ၢ်မူ(ကီၢ်တကူၣ်)န့ၣ်လီၤ.